Amerikaning Goldman Sachs banki 2008-yilda moliyaviy inqirozga olib kelgan ipoteka obligatsiyalari bo‘yicha bitimlar haqidagi ishni tartibga solish doirasida 5,06 milliard dollar to‘lashga rozi bo‘ldi, deya xabar bermoqda “RBK” AQSh adliya vazirligiga tayanib. Ushbu mablag‘ning 1,8 milliard dollarini Goldman Sachs jabrlangan qarz oluvchilarni qo‘llab-quvvatlashga yo‘naltiradi.
Muassasa bayonotida aytilishicha, murosa bitimi AQSh hukumatida Goldman Sachs’ga nisbatan jinoyat ishi qo‘zg‘atish huquqini saqlab qoladi va bank vakillarini jinoiy yoki ma’muriy javobgarlik imkoniyatidan mahrum etmaydi.
Bitim doirasida Goldman Sachs 2005—2007-yillarda ipoteka qimmatbaho qog‘ozlarining potensial investorlarini chalg‘itganini tan olishga rozi bo‘ldi. Bank ularni obligatsiyalar sifatli ipoteka kreditlari bilan ta’minlanganini aytib ishontirgan, aslida esa bank ushbu kreditlar to‘lanmasligini bilgan. Buning natijasida bunday obligatsiyalarga sarmoya kiritganlar milliardlab zarar ko‘rgan.
Izoh (0)