Yevropa markaziy banki 500 yevro qiymatidagi kupyuralarni muomaladan chiqarish ehtimolini o‘rganmoqda

Yevropa markaziy banki (YeMB) ekspertlar guruhiga 500 yevroli kupyuralarni muomaladan chiqarish ehtimoli bilan bog‘liq xatarlarni o‘rganishni topshirdi. Bu haqda bank matbuot xizmati vakili ma’lum qilgan, deya xabar beradi “TASS”.

“Hozirda ekspertlar bu nimaga olib kelishi mumkinligini tekshirmoqda. Yakunda o‘rganish natijalari boshqaruvchilar kengashiga taqdim etiladi, biroq hali jarayon oxiriga yetmagan”, — deya ta’kidlagan vakil YeMB rahbari Mario Dragining Yevroparlament iqtisodiy va moliyaviy masalalar qo‘mitasidagi chiqishi chog‘ida “500 yevro qiymatidagi kupyuralar nolegal faoliyat uchun tobora ko‘proq vosita bo‘lib qolmoqda”, deganini eslatib o‘tdi.

Frankfurter Allgemeine Zeitung nashri hisob-kitoblariga ko‘ra, mazkur kupyuralarni muomaladan chiqarish xarajatlari taxminan 500 million yevroga boradi. Ayni paytda shunday qiymatdagi banknotlardan 600 millionga yaqini muomalada yuribdi.