Argentina terma jamoasi va “Barselona” hujumchisi Lionel Messining oilasi Mossack Fonseca kompaniyasi (Panama) bilan hech qanday moliyaviy munosabatlarda bo‘lmaganini bildirdi va o‘yinchi nomi tilga olingan ofshor operatsiyalari haqida ma’lumot tarqatgan Jurnalistlik tekshiruvlari xalqaro konsorsiumi (ICIJ) ayblovlarini rad etdi. Bu haqda futbolchining oilasi rasmiy bayonotida ma’lum qilingan, deya xabar beradi “TASS”.
ICIJ hisobotlari ofshorlarda kompaniyalarni ro‘yxatdan o‘tkazishda huquqiy ko‘mak beradigan Mossack Fonseca hujjatlariga asoslangan bo‘lib, ularda “Barselona”, “Manchester Yunayted” va “Real” kabi mashhur klublarda to‘p surgan yoki surayotgan 20 nafar taniqli futbolchi nomi keltirib o‘tilgan. Hisobotga ko‘ra, Panamada ro‘yxatdan o‘tgan Mega Star Enterprises kompaniyasi Lionel va uning otasi Xorxega tegishli.
“Lionel Messi OAV orqali ayblanayotgan harakatlardan hech birini amalga oshirmagan. Mazkur yolg‘on ma’lumotlar uning go‘yoki soliqlarni to‘lashdan bo‘yin tovlashi, mablag‘lardan noqonuniy foydalaniladigan tarmoq yaratishi xususidagi yangi to‘qimalardan bo‘lak narsa emas. Mega Star Enterprises kompaniyasi hech qachon ochiq moliyaviy hisob raqamlari va fondlarga ega bo‘lmagan. Bu jinoyatkorona ayblovlar Lionel Messiga o‘nglab bo‘lmas zarar keltirmoqda. Biz sud orqali ushbu bo‘hton ma’lumotlarga qarshi huquqiy harakatlarni qo‘llash ehtimolini ko‘rib chiqmoqdamiz”, — deya ta’kidlanadi Messi oilasining bayonotida.
Izoh (0)