Лионель Мессининг оиласи офшор операцияларида иштирок этганлик ҳақидаги айбловларни инкор этди

Аргентина терма жамоаси ва «Барселона» ҳужумчиси Лионель Мессининг оиласи Mossack Fonseca компанияси (Панама) билан ҳеч қандай молиявий муносабатларда бўлмаганини билдирди ва ўйинчи номи тилга олинган офшор операциялари ҳақида маълумот тарқатган Журналистлик текширувлари халқаро консорциуми (ICIJ) айбловларини рад этди. Бу ҳақда футболчининг оиласи расмий баёнотида маълум қилинган, дея хабар беради «ТАСС».

ICIJ ҳисоботлари офшорларда компанияларни рўйхатдан ўтказишда ҳуқуқий кўмак берадиган Mossack Fonseca ҳужжатларига асосланган бўлиб, уларда «Барселона», «Манчестер Юнайтед» ва «Реал» каби машҳур клубларда тўп сурган ёки сураётган 20 нафар таниқли футболчи номи келтириб ўтилган. Ҳисоботга кўра, Панамада рўйхатдан ўтган Mega Star Enterprises компанияси Лионель ва унинг отаси Хорхега тегишли.

«Лионель Месси ОАВ орқали айбланаётган ҳаракатлардан ҳеч бирини амалга оширмаган. Мазкур ёлғон маълумотлар унинг гўёки солиқларни тўлашдан бўйин товлаши, маблағлардан ноқонуний фойдаланиладиган тармоқ яратиши хусусидаги янги тўқималардан бўлак нарса эмас. Mega Star Enterprises компанияси ҳеч қачон очиқ молиявий ҳисоб рақамлари ва фондларга эга бўлмаган. Бу жинояткорона айбловлар Лионель Мессига ўнглаб бўлмас зарар келтирмоқда. Биз суд орқали ушбу бўҳтон маълумотларга қарши ҳуқуқий ҳаракатларни қўллаш эҳтимолини кўриб чиқмоқдамиз», — дея таъкидланади Месси оиласининг баёнотида.