Britaniyaning The Sunday Times gazetasi 150 nafar yetakchi britaniyalik sportchilar dopingga minglab funt sarflaganini ko‘rsatgan tadqiqot natijalarini e’lon qildi, deb yozadi “RBK”. Taqiqlangan preparatlarni ular doktor Mark Bonardan olgan. U o‘zini yashirin kamera bilan tasvirga olishayotganini bilmagan holda, bu haqda gapirib berdi.

Londondagi xususiy klinika rahbari bo‘lmish Bonar mijozlarning keng tarmog‘iga ega ekanligi, ular uning yordami bilan taqiqlangan preparatlarni qabul qilishini aytdi. Bunday mijozlar orasida Tur de Frans velopoygasining britaniyalik ishtirokchilari, boks chempionlari, tennischilar, shuningdek, “Arsenal”, “Chelsi”, “Lester” va “Birmingem” futbol jamoalari o‘yinchilari bor. Maqolada ularning ismlari keltirilmagan, gazeta esa unda doktorning so‘zlarini isbotlovchi dalil yo‘qligini tan oldi.

Britaniya antidoping agentligi ikki yil avvalroq Bonarning faoliyatidan xabar topgan, ammo uning oldini olish bo‘yicha hech narsa qilmagan. Shu tufayli Buyuk Britaniya madaniyat, OAV va sport vaziri bu borada tekshiruv boshlashni buyurdi.