Jahon boks assotsiatsiyasining (WBA) o‘ta og‘ir vaznda jahon chempioni unvoni uchun Ruslan Chagayev va Lukas Braun o‘rtasidagi jang tashkilotchilari avstraliyalik bokschi bilan bog‘liq doping mojarosiga aloqadorliklarini inkor etdi. Shuningdek, mazkur bellashuv natijasi bekor qilinishini talab etmoqda. Bu haqda “Ahmad Promoushen” kompaniyasi rahbari Timur Dugazayev ma’lum qildi, deya xabar beradi “TASS”.
“Mazkur masala bilan shug‘ullanayotgan tegishli antidoping tashkilotlari bor. Grozniyda Braunning jamoasi uchun zarur barcha sharoitlar yaratib berilgandi. Biz avstraliyalik bokschining menejerlari va promouterlariga hurmat bilan munosabatdamiz, biroq doping Braunga Chechenistonga tushib qolgani haqida dalillar yo‘q. Agar shunday bo‘lganda, bellashuvdan keyinoq Checheniston rahbari Ramzan Qodirov ko‘rsatmasiga ko‘ra revansh jangini o‘tkazish yuzasidan muzokaralar o‘tkazilmagan bo‘lardi. Braunning tahlillarida taqiqlangan preparat topilganini hisobga olib, Grozniydagi jang natijasi bekor qilinishi lozim”, — deya ta’kidlagan Dugazayev.
Eslatib o‘tamiz, oldinroq Lukas Braun doping mojarosi borasida rasmiy bayonot berib, “taqiqlangan moddalar iste’moliga qarshi ekanligi, bunday pastkashlikka bormasligi va yaqin orada barcha masalaga oydinlik kirishi”ni ma’lum qilgandi.
Izoh (0)