“Barselona” “Real” bilan o‘yin chog‘ida Yoxan Kroyf xotirasini yodga oladi

“Barselona” Ispaniya chempionatining 31-turi doirasida Madridning “Real”iga qarshi o‘yinda jamoaning sobiq o‘yinchisi va murabbiyi Yoxan Kroyf xotirasini sharaflaydi, deya xabar bermoqda “Korrespondent.net”.

Tribunalarga 90 mingta bo‘lakdan iborat “Rahmat, Yoxan!” yozuvi tushirilgan mozaika joylanadi.

“Barselona”—“Real” uchrashuvi 2-aprel kuni Kataloniya poytaxtidagi Kamp Nou stadionida bo‘lib o‘tadi. “Rahmat, Yoxan!” jumlasi, shuningdek, “Barselona” o‘yinchilari va matchdan oldin jamoa a’zolari bilan birga maydonda paydo bo‘ladigan bolalarning futbolkalariga ham tushiriladi. O‘yinning o‘zi bir daqiqalik sukut bilan boshlanadi.

Yoxan Kroyff “Barselona” tarkibida 1973–1978-yillarda to‘p surgan, 1988–1996-yillarda esa u jamoaga murabbiylik qilgan.

Ilgariroq “Barselona” muxlislari klub stadioni “Kamp Nou”ni Yoxan Kroyff sharafiga nomlashni taklif etib, Twitter’da maxsus #EstadiJohanCruyff heshtegini yaratgani xabar qilingan edi.

O‘pka saratoniga qarshi bir necha yildan buyon kurash olib borgan Yoxan Kroyff 24-mart, payshanba kuni 68 yoshida vafot etdi.