AQSh prezidenti Barak Obamaning Kubaga tashrifi boshlandi. Davlat rahbari Xose Marti nomli aeroportga oilasi — rafiqasi Mishel, qizlari Maliya va Sasha, shuningdek, qaynonasi Mariann Shilds Robinson bilan birga uchib kelgan. Bu haqda “Interfaks” xabar berdi.
Safar chog‘ida prezidentga Davlat kotibi Jon Kerri, Kuba bilan muloqotni kengaytirish tarafdori bo‘lgan bir necha nafar respublikachi kongressmen va amerikalik biznesmenlar guruhi ham hamrohlik qilmoqda.
Tashrif kun tartibiga ko‘ra, Obamaning eski Gavana bo‘ylab sayr etishi, Kuba rahbari Raul Kastro, Gavana arxiyepiskopi, kardinal Xayme Ortega, shuningdek, mamlakat fuqarolik jamiyati vakillari bilan uchrashuvlari ko‘zda tutilgan. Kuba inqilobi yetakchisi Fidel Kastro bilan muloqot rejalashtirilmagani bildirilmoqda.
Eslatib o‘tamiz, Barak Obama 88 yil davomida mazkur orol-davlatga kelgan AQShning birinchi amaldagi davlat rahbari bo‘ldi. AQSh 1961-yilda Kuba bilan diplomatik aloqalarni uzgan va savdo-iqtisodiy embargoni joriy etgandi.
Izoh (0)