Madridning “Real” futbol klubi hujumchisi Krishtianu Ronaldu Ispaniya chempionati 29-turidan o‘rin olgan “Las-Palmas”ga qarshi uchrashuvdan so‘ng Marokashga yo‘l oldi, deya xabar bermoqda “Chempionat.com”.
“Real” rahbariyati Ronalduga Marokashga tez-tez safar qilishni taqiqlab qo‘ygandi — klub prezidenti Florentino Peres futbolchi safar bilan ovora bo‘lib, jamoadagi faoliyatiga yetarlicha e’tibor qaratmayotganidan xavotir bildirgandi.
Biroq, “Chempionat.com”ning yozishicha, Ronaldu maydon tashqarisidagi hayotini rejalashtirishda klub prezidenti Florentino Peresga bo‘ysunmoqchi emas.
Avvalroq portugaliyalik futbolchi Marokashga kikboksyor do‘sti Badr Hari bilan uchrashish uchun borayotgani haqida xabarlar paydo bo‘lgandi. Xususan, Ronaldu “Espanyol”ga qarshi o‘yindan keyin ham Marokashga uchib ketgan edi.
Keyinroq futbolchi bu tashrifdan maqsadi do‘sti bilan uchrashish bo‘lmaganini ma’lum qilgandi. “Las-Palmas” bilan o‘yindan keyingi sayohatdan maqsad nima ekanligi hozircha oshkor etilmagan.
Ma’lumot uchun, “Real” 29-turni 2:1 hisobidagi g‘alaba bilan yakunlaganiga qaramay, bu uchrashuvda Ronaldu shaxsiy antirekordini yangiladi. Bundan avvalroq Ronaldu klub rahbariyatidan o‘zini transferga qo‘yishlarini so‘ragani haqida xabar berilgan edi.
Izoh (0)