Испаниянинг «Барселона» клуби Европа Чемпионлар Лигаси ўрнига Европа суперлигасини ташкил этиш ғоясини қўллаб-қувватлайди. Бу ҳақда клубнинг молиявий масалалар бўйича вице-президенти Сюзан Монье La Vanguardia нашрига берган интервьюсида айтиб ўтди, дея хабар бермоқда «ТАСС».
«Биз клубларнинг ўзи бошқарадиган Европа лигасига асос солишимиз керак. Ҳозир биз ФИФА ва УЕФА каби ташкилотларга ҳаддан ташқари боғланиб қолганмиз. Суперлига каби мусобақани ташкил этиш бизнинг бош мақсадимиз бўлиши керак», — деди Монье.
Аввалроқ ОАВда Англиянинг «Арсенал», «Ливерпуль», «Манчестер Юнайтед», «Манчестер Сити», «Челси» каби гранд клублари раҳбарлари америкалик миллиардер Стивен Росс билан учрашиб, Чемпионлар Лигаси ёки Англия Премьер-лигаси ўрнини босиши мумкин бўлган янги мусобақага асос солиш масаласини муҳокама қилганликлари ҳақида хабар берилганди.
Кейинроқ «Арсенал» ва «Манчестер Юнайтед» раҳбарлари бундай кўринишдаги суперлига ташкил этилишига қарши эканликларини билдиришди.
Янги мусобақага асос солиш ғояси илк бор 1998 йилда пайдо бўлганди. Ўшанда Италия спорт компанияларидан бири — Media Partners Европанинг етакчи жамоалари билан музокаралар ўтказган, улар орасида «Милан», «Манчестер Юнайтед» каби машҳур жамоалар ҳам бор эди. ФИФА бу таклифга дарҳол ўз эътирозини билдириб, мусобақага қўшилган миллий уюшмалар, клублар ва футболчиларни дисквалификация қилиш билан таҳдид қилганди.
УЕФА эса бу ҳодисага Чемпионлар Лигаси гуруҳ босқичи иштирокчилари сонини 24 тадан 32 тагача кўпайтириш, шунингдек, қитъада иккинчи рақамли клублар мусобақаси — Европа Лигаси (собиқ УЕФА Кубоги)га асос солиш билан муносабат билдирган.
Изоҳ (0)