Jangarilar Suriya harbiy-havo kuchlari samolyotini urib tushirdi

Suriyadagi qurolli guruhlar a’zolari Xama provinsiyasida hukumat qo‘shinlari harbiy samolyotini urib tushirdi, deya xabar bermoqda “Interfaks”.

Suriya mudofaa vazirligi ma’lumotlariga ko‘ra, jangarilar samolyotni u harbiy bazaga qo‘nayotgan vaqtida nishonga olgan. Shu tariqa, hukumat tomoni fikricha, qurolli guruhlar o‘t ochishni to‘xtatish haqidagi bitim shartlarini buzgan.

Guruhlar vakillari samolyot Xamadagi tinch aholini bombardimon qilganini aytdi. Ular videoyozuvni e’lon qildi, unda, ularning so‘zlariga ko‘ra, samolyot tinch aholiga zarba berayotgani aks etgan. Shuningdek, videoda samolyotdan uchuvchi katapulta qilayotganini ko‘rish mumkin. Uning tirik qolgan-qolmagani noma’lum.

Xamada o‘t ochishni to‘xtatish haqidagi xalqaro bitimni bajarishga rozi bo‘lgan guruhlar bor-yo‘qligi tasdiqlanganicha yo‘q.