Bir muddat avval: “Xonanda Shuhrat Qayumov konsertga tayyorgarlik ko‘rish jarayonida salomatligi yomonlashib, kasalxonaga tushib qoldi”, mazmunidagi gap-so‘zlar tarqalgan edi. 22—23 mart kunlari “Istiqlol” san’at saroyida jonli konsert berishni rejalashtirgan Shuhrat Qayumov “salomatligi ko‘tarmagani bois” konsertni fonogrammada o‘tkazadi, degan gaplar nechog‘lik to‘g‘riligini bilish maqsadida jurnalist Feruz Muhammad xonandaning o‘zi bilan bog‘landi.
— Sizni shifoxonada davolanayapti, deb eshitgan edik. Ayni paytda shifoxonadan chiqib, konsertga tayyorgarlikni boshlab yubordingizmi?— Hozir shifoxonadan chiqqanman. Har kuni tinimsiz mehnat qilyapman. Fonogramma bo‘lganida qanday qulay edi. Repetitsiya ham bo‘lmasdi, diskni qo‘yib, so‘zlarni ham yodlamasdan yuraverardik. Jonli konsert dasturi bo‘lganidan keyin, muxlislar ishonchini oqlash uchun tinimsiz mehnat qilyapmiz.
— Ijodiy jamoangiz necha kishidan iborat?— Jamoamizda 12 sozanda, 26 raqqosa tinim bilmasdan ijod qilmoqda. Tayyorgarlik jarayoni bir oy oldindan boshlangan edi. Tayyorgarlikning boshida kuchli shamollash bilan shifoxonaga tushib qoldim. Hozir ham ahvolim unchalik yaxshi emas. Nima bo‘lganda ham, emaklab bo‘lsa-da, konsertga tayyorgarlikni to‘xtatmayapman.
— Salomatligi yomonlashgani tufayli Shuhrat Qayumov konsertni fonogrammada o‘tkazadi, degan gaplar tarqaldi. Bunga qanday munosabat bildirasiz?— To‘g‘risi, fonogramma qilishning iloji yo‘q, chunki konsertda kuylaydigan qo‘shiqlarimning fonogramma varianti yo‘q. Hozir tayyorgarlik ko‘rilmoqda, ammo hali ham yo‘talim qolmagan, shamollashdan to‘la tuzalmaganman. Bu oxirgi konsert dasturim bo‘lishi mumkin edi. Ijodiy jamoamiz a’zolari: “Bu haqda aytmay turing”, degani sababli ham shu vaqtgacha jim edim. Yana konsert beramanmi-yo‘qmi, hali noma’lum. Ammo so‘nggi konsertimni fonogramma bilan o‘tkazib, sahnadan ketmoqchi emasman. Agar bu konsert dasturini fonogrammada o‘tkazadigan bo‘lsak, raqqosalar ham raqs tusha olmaydi. Sababi konsert repertuarining asosiy qismi yangi ijod namunalarimdan tuzilgan. Konsertni fonogrammada o‘tkaza qolaylik, degan takliflar bo‘lgani uchun shunday gaplar tarqalgan bo‘lsa kerak. Konsertni jonli berishga so‘nggi nafasimgacha, astoydil harakat qilaman.
Izoh (0)