Бир муддат аввал: «Хонанда Шуҳрат Қаюмов концертга тайёргарлик кўриш жараёнида саломатлиги ёмонлашиб, касалхонага тушиб қолди», мазмунидаги гап-сўзлар тарқалган эди. 22—23 март кунлари «Истиқлол» санъат саройида жонли концерт беришни режалаштирган Шуҳрат Қаюмов «саломатлиги кўтармагани боис» концертни фонограммада ўтказади, деган гаплар нечоғлик тўғрилигини билиш мақсадида журналист Феруз Муҳаммад хонанданинг ўзи билан боғланди.
— Сизни шифохонада даволанаяпти, деб эшитган эдик. Айни пайтда шифохонадан чиқиб, концертга тайёргарликни бошлаб юбордингизми?— Ҳозир шифохонадан чиққанман. Ҳар куни тинимсиз меҳнат қиляпман. Фонограмма бўлганида қандай қулай эди. Репетиция ҳам бўлмасди, дискни қўйиб, сўзларни ҳам ёдламасдан юраверардик. Жонли концерт дастури бўлганидан кейин, мухлислар ишончини оқлаш учун тинимсиз меҳнат қиляпмиз.
— Ижодий жамоангиз неча кишидан иборат?— Жамоамизда 12 созанда, 26 раққоса тиним билмасдан ижод қилмоқда. Тайёргарлик жараёни бир ой олдиндан бошланган эди. Тайёргарликнинг бошида кучли шамоллаш билан шифохонага тушиб қолдим. Ҳозир ҳам аҳволим унчалик яхши эмас. Нима бўлганда ҳам, эмаклаб бўлса-да, концертга тайёргарликни тўхтатмаяпман.
— Саломатлиги ёмонлашгани туфайли Шуҳрат Қаюмов концертни фонограммада ўтказади, деган гаплар тарқалди. Бунга қандай муносабат билдирасиз?— Тўғриси, фонограмма қилишнинг иложи йўқ, чунки концертда куйлайдиган қўшиқларимнинг фонограмма варианти йўқ. Ҳозир тайёргарлик кўрилмоқда, аммо ҳали ҳам йўталим қолмаган, шамоллашдан тўла тузалмаганман. Бу охирги концерт дастурим бўлиши мумкин эди. Ижодий жамоамиз аъзолари: «Бу ҳақда айтмай туринг», дегани сабабли ҳам шу вақтгача жим эдим. Яна концерт бераманми-йўқми, ҳали номаълум. Аммо сўнгги концертимни фонограмма билан ўтказиб, саҳнадан кетмоқчи эмасман. Агар бу концерт дастурини фонограммада ўтказадиган бўлсак, раққосалар ҳам рақс туша олмайди. Сабаби концерт рэпертуарининг асосий қисми янги ижод намуналаримдан тузилган. Концертни фонограммада ўтказа қолайлик, деган таклифлар бўлгани учун шундай гаплар тарқалган бўлса керак. Концертни жонли беришга сўнгги нафасимгача, астойдил ҳаракат қиламан.
Изоҳ (0)