Yaponiya bosh vaziri Sindzo Abe hukumat va mahalliy rasmiylar o‘rtasida kelishmovchilikka sabab bo‘layotgan Okinava prefekturasida AQSh harbiy bazasini bir manzildan ikkinchisiga ko‘chirilishini to‘xtatib turishga rozi bo‘ldi. Bu haqda “Interfaks” xabar bermoqda.
Sud taklifi va hukumat rahbari qaroriga ko‘ra, Okinava orolidagi “Futemma” AQSh dengiz piyodalari korpusi bazasini ko‘chirish bo‘yicha tayyorgarlik ishlari vaqtincha to‘xtatiladi va ushbu masalada yana muzokaralar boshlanadi. O‘tgan yil oxirida Okinava gubernatori Takesi Onaga AQSh bazasini prefektura poytaxti Naxa atrofidan shu prefektura hududida joylashgan Xenoko tumaniga ko‘chirilishiga taqiq qo‘yilganini e’lon qildi. Hukumat sud orqali mazkur qarorni bekor qilishga urinib ko‘rdi, biroq gubernator bunga javoban qarshi da’vo berdi.
Vashington va Tokio “Futemma” bazasini Xenokoga ko‘chirish to‘g‘risida 1996-yildayoq kelishuvga erishgan, ammo orol rasmiylari bunga qat’iy qarshi chiqib, baza prefektura hududidan chetda bo‘lishini talab qilgandi. Okinava aholisi amerikalik harbiylar ishtirokidagi mojarolar va jinoyatlardan norozi bo‘lmoqda. Shuningdek, Xenokoda qurilish ishlari olib borilishi mazkur hududdagi marjon qoyalariga zarar yetkazishi ta’kidlanmoqda.
Ma’lumotlarga ko‘ra, Okinava oroli Yaponiya hududining 1 foizini tashkil etsa-da, bu yerda mamlakatda bo‘lgan amerikalik harbiylarning 75 foizi joylashtirilgan.
Izoh (0)