Япония бош вазири Синдзо Абэ ҳукумат ва маҳаллий расмийлар ўртасида келишмовчиликка сабаб бўлаётган Окинава префектурасида АҚШ ҳарбий базасини бир манзилдан иккинчисига кўчирилишини тўхтатиб туришга рози бўлди. Бу ҳақда «Интерфакс» хабар бермоқда.
Суд таклифи ва ҳукумат раҳбари қарорига кўра, Окинава оролидаги «Футэмма» АҚШ денгиз пиёдалари корпуси базасини кўчириш бўйича тайёргарлик ишлари вақтинча тўхтатилади ва ушбу масалада яна музокаралар бошланади. Ўтган йил охирида Окинава губернатори Такэси Онага АҚШ базасини префектура пойтахти Наха атрофидан шу префектура ҳудудида жойлашган Хэноко туманига кўчирилишига тақиқ қўйилганини эълон қилди. Ҳукумат суд орқали мазкур қарорни бекор қилишга уриниб кўрди, бироқ губернатор бунга жавобан қарши даъво берди.
Вашингтон ва Токио «Футэмма» базасини Хэнокога кўчириш тўғрисида 1996 йилдаёқ келишувга эришган, аммо орол расмийлари бунга қатъий қарши чиқиб, база префектура ҳудудидан четда бўлишини талаб қилганди. Окинава аҳолиси америкалик ҳарбийлар иштирокидаги можаролар ва жиноятлардан норози бўлмоқда. Шунингдек, Хэнокода қурилиш ишлари олиб борилиши мазкур ҳудуддаги маржон қояларига зарар етказиши таъкидланмоқда.
Маълумотларга кўра, Окинава ороли Япония ҳудудининг 1 фоизини ташкил этса-да, бу ерда мамлакатда бўлган америкалик ҳарбийларнинг 75 фоизи жойлаштирилган.
Изоҳ (0)