Rossiya, Buyuk Britaniya, Germaniya, Fransiya va Italiya yetakchilari Suriya bo‘yicha “yo‘l xaritasi”ni ma’qulladi
Rossiya prezidenti Vladimir Putin, Buyuk Britaniya bosh vaziri Devid Kemeron, Germaniya kansleri Angela Merkel, Fransiya prezidenti Fransua Olland va Italiya bosh vaziri Matteo Rensi 4-mart, juma kuni telefon orqali muloqotda bo‘ldi. Unda Suriyani qo‘llab-quvvatlash xalqaro guruhi tomonidan kelishilgan va BMT Xavfsizlik Kengashi rezolyutsiyasi bilan tasdiqlangan inqirozni bartaraf etish “yo‘l xaritasi” ma’qullandi. Bu haqda “TASS” xabar bermoqda.
Foto: AP
“Yetakchilar Suriyada jangovar harakatlarni to‘xtatish to‘g‘risidagi Rossiya va AQSh kelishuvi bajarilishini batafsil muhokama etdi. O‘t ochishni to‘xtatish tartibiga umuman olganda rioya etilayotgani, ilk ijobiy natijalarni berayotgani va BMT shafeligida Suriya bo‘yicha muloqotning yo‘lga qo‘yilishiga asos yaratayotganligi e’tirof etildi.
Rossiya tomoni Suriya rasmiylarining aprel oyida mamlakatda parlament saylovlarini o‘tkazish to‘g‘risidagi qarori amaldagi konstitutsiyaga binoan qabul qilingani va tinchlik o‘rnatish bo‘yicha sa’y-harakatlarga xalaqit bermasligini bildirdi”, — deya ta’kidlanadi Kreml matbuot xizmati xabarida.
Izoh (0)