Checheniston rahbari Ramzan Qodirov o‘ta og‘ir vaznda WBA yo‘nalishi bo‘yicha jahon chempioni Ruslan Chagayev va avstraliyalik Lukas Braun o‘rtasida bo‘lib o‘tadigan jang oldidan hayajonlangani sababli 8 kilogrammga ozib ketganini ma’lum qildi. Bu haqda “TASS” xabar bermoqda.
“Ruslan Chagayev bellashuv oldidan umuman hayajonlanmaydi. Men bo‘lsa hayajondan o‘zimni tiyolmayapman, hatto 8 kilogrammga ozib ham ketdim. Agar erta-indin jang tugamasa, menga tomchi dori ulashlariga to‘g‘ri keladi, chunki tinchlantiruvchi dorilar ham ta’sir qilmayapti”, — deya ta’kidlagan Qodirov.
Checheniston rahbarining fikricha, chempionlik kamari albatta Chagayevda qolishi kerak. “Butun dunyo bu jangni kutyapti. Men Yaratgandan bellashuv chiroyli tarzda yakunlanishini so‘rayman”, — deya tilak qilgan u.
Eslatib o‘tamiz, Chagayev va Braun o‘rtasidagi jang 5-mart, shanba kuni Grozniydagi “Kolizey” sport majmuasida bo‘lib o‘tadi. Ushbu bahs Rossiyaning “Match TV” sport telekanali orqali namoyish etilishi rejalashtirilgan.
Izoh (0)