Чеченистон раҳбари Рамзан Қодиров ўта оғир вазнда WBA йўналиши бўйича жаҳон чемпиони Руслан Чагаев ва австралиялик Лукас Браун ўртасида бўлиб ўтадиган жанг олдидан ҳаяжонлангани сабабли 8 килограммга озиб кетганини маълум қилди. Бу ҳақда «ТАСС» хабар бермоқда.
«Руслан Чагаев беллашув олдидан умуман ҳаяжонланмайди. Мен бўлса ҳаяжондан ўзимни тиёлмаяпман, ҳатто 8 килограммга озиб ҳам кетдим. Агар эрта-индин жанг тугамаса, менга томчи дори улашларига тўғри келади, чунки тинчлантирувчи дорилар ҳам таъсир қилмаяпти», — дея таъкидлаган Қодиров.
Чеченистон раҳбарининг фикрича, чемпионлик камари албатта Чагаевда қолиши керак. «Бутун дунё бу жангни кутяпти. Мен Яратгандан беллашув чиройли тарзда якунланишини сўрайман», — дея тилак қилган у.
Эслатиб ўтамиз, Чагаев ва Браун ўртасидаги жанг 5 март, шанба куни Грознийдаги «Колизей» спорт мажмуасида бўлиб ўтади. Ушбу баҳс Россиянинг «Матч ТВ» спорт телеканали орқали намойиш этилиши режалаштирилган.
Изоҳ (0)