Qarshining “Nasaf” jamoasi yarim himoyachisi Artur Gevorkyan Osiyo futbol konfederatsiyasi tomonidan Osiyo Chempionlar Ligasining joriy mavsumida porlashi kutilayotgan futbolchilardan biri sifatida e’tirof etildi.
Turkmanistonlik futbolchi so‘nggi besh yil davomida “Nasaf” sharafini himoya qilib, jamoa bilan bir qator yutuqlarga erishgan. U 2011-yilda “Paxtakor”dan Qarshi klubiga o‘tgan va muvaffaqiyatlarga erishishni boshlagan. O‘shanda Gevorkyan “Nasaf” bilan Osiyo Kubogi bahslarida g‘olib bo‘lgan va musobaqaning eng yaxshi o‘yinchisi deb topilgandi.
“31 yoshli tajribali futbolchi shu kungacha Osiyo Chempionlar Ligasi bahslarida 17 o‘yinda maydonga tushib, raqiblar darvozasiga 5 ta gol kiritgan. 2013-yilda O‘zbekiston chempionatining eng yaxshi o‘yinchisi, 2014-yilda O‘zbekiston chempionatining to‘purari bo‘lgan Artur Gevorkyan joriy mavsumdagi Osiyo Chempionlar Ligasida porlashi kutilayotgan futbolchilardan biri”, — deyiladi OFK saytida.
Shuningdek, OFK rasmiy sayti “Nasaf” a’zolari Ilhom Shomurodov, Erkin Boydullayev va Shuhrat Muhammadiyev OChLda jamoasining g‘alabalariga hissa qo‘shishi mumkinligini alohida ta’kidlab o‘tgan.
Ma’lumot o‘rnida, “Nasaf” jamoasi Osiyo Chempionlar Ligasi “D” guruhidan o‘rin olgan bo‘lib, “Al-Ayn” (BAA), “Al-Ahli” (Saudiya Arabistoni) va “Al-Jaish” (Qatar) klublariga qarshi bahs olib boradi. Qarshiliklar guruh bosqichidagi ilk o‘yinini ertaga, 24-fevral kuni safarda “Al-Ahli”ga qarshi o‘tkazadi.
Izoh (0)