Қаршининг «Насаф» жамоаси ярим ҳимоячиси Артур Геворкян Осиё футбол конфедерацияси томонидан Осиё Чемпионлар Лигасининг жорий мавсумида порлаши кутилаётган футболчилардан бири сифатида эътироф этилди.
Туркманистонлик футболчи сўнгги беш йил давомида «Насаф» шарафини ҳимоя қилиб, жамоа билан бир қатор ютуқларга эришган. У 2011 йилда «Пахтакор»дан Қарши клубига ўтган ва муваффақиятларга эришишни бошлаган. Ўшанда Геворкян «Насаф» билан Осиё Кубоги баҳсларида ғолиб бўлган ва мусобақанинг энг яхши ўйинчиси деб топилганди.
«31 ёшли тажрибали футболчи шу кунгача Осиё Чемпионлар Лигаси баҳсларида 17 ўйинда майдонга тушиб, рақиблар дарвозасига 5 та гол киритган. 2013 йилда Ўзбекистон чемпионатининг энг яхши ўйинчиси, 2014 йилда Ўзбекистон чемпионатининг тўпурари бўлган Артур Геворкян жорий мавсумдаги Осиё Чемпионлар Лигасида порлаши кутилаётган футболчилардан бири», — дейилади ОФК сайтида.
Шунингдек, ОФК расмий сайти «Насаф» аъзолари Илҳом Шомуродов, Эркин Бойдуллаев ва Шуҳрат Муҳаммадиев ОЧЛда жамоасининг ғалабаларига ҳисса қўшиши мумкинлигини алоҳида таъкидлаб ўтган.
Маълумот ўрнида, «Насаф» жамоаси Осиё Чемпионлар Лигаси «D» гуруҳидан ўрин олган бўлиб, «Ал-Айн» (БАА), «Ал-Аҳли» (Саудия Арабистони) ва «Ал-Жаиш» (Қатар) клубларига қарши баҳс олиб боради. Қаршиликлар гуруҳ босқичидаги илк ўйинини эртага, 24 февраль куни сафарда «Ал-Аҳли»га қарши ўтказади.
Изоҳ (0)