O‘zbekiston Mehnat va aholini ijtimoiy muhofaza qilish vazirligi Mehnat vazirligiga aylantirildi. Bu Prezident Islom Karimovning 22-fevraldagi “Aholining zaif qatlamlarini ijtimoiy himoya va tibbiy-ijtimoiy yordam bilan ta’minlash tizimini yanada takomillashtirish chora-tadbirlari to‘g‘risida”gi farmonida ko‘zda tutilgan, deb yozadi “Gazeta.uz” hukumatdagi manbasiga tayanib.
Tahririyat tanishib chiqqan hujjatga muvofiq, endi nogironlar, urush qatnashchilari, faxriylar, yolg‘iz qariyalar va aholining boshqa zaif qatlamlariga tibbiy-ijtimoiy ko‘mak ko‘rsatish bo‘yicha, shuningdek, imkoniyati cheklangan shaxslarga kasbiy ta’lim berishni tashkil qilish va inklyuziv kasbiy ta’lim bo‘yicha vazifalar Sog‘liqni saqlash vazirligiga yuklanadi.
Ehtiyojmand oila va fuqarolarga ijtimoiy nafaqa va moddiy ko‘mak belgilash va to‘lash ustidan nazorat bo‘yicha vazifalar esa Moliya vazirligiga topshiriladi.
Shuningdek, “Muruvvat” va “Saxovat” uylari, Nogironlarni reabilitatsiya qilish va protezlash milliy markazi, hududiy nogironlar reabilitatsiya markazlari, urush va mehnat faxriylari uchun sanatoriya va pansionatlar, Toshkent va Farg‘onadagi imkoniyati cheklangan shaxslar uchun respublika ixtisoslashtirilgan kasb-hunar kollejlari, shuningdek, poytaxtdagi 2-sonli huquqshunoslik kolleji Mehnat va aholini ijtimoiy muhofaza qilish vazirligidan Sog‘liqni saqlash vazirligi tasarrufiga o‘tkaziladi.
Mehnat vazirligi faoliyatining asosiy vazifa va yo‘nalishlari aholi bandligi darajasini chuqur tahlil qilish, bandlikni ta’minlash dasturini ishlab chiqish va uni amalga oshirishni monitoring qilishdan iborat bo‘ladi.
Izoh (0)