Ўзбекистон Меҳнат ва аҳолини ижтимоий муҳофаза қилиш вазирлиги Меҳнат вазирлигига айлантирилди. Бу Президент Ислом Каримовнинг 22 февралдаги «Аҳолининг заиф қатламларини ижтимоий ҳимоя ва тиббий-ижтимоий ёрдам билан таъминлаш тизимини янада такомиллаштириш чора-тадбирлари тўғрисида»ги фармонида кўзда тутилган, деб ёзади «Газета.uz» ҳукуматдаги манбасига таяниб.
Таҳририят танишиб чиққан ҳужжатга мувофиқ, энди ногиронлар, уруш қатнашчилари, фахрийлар, ёлғиз қариялар ва аҳолининг бошқа заиф қатламларига тиббий-ижтимоий кўмак кўрсатиш бўйича, шунингдек, имконияти чекланган шахсларга касбий таълим беришни ташкил қилиш ва инклюзив касбий таълим бўйича вазифалар Соғлиқни сақлаш вазирлигига юкланади.
Эҳтиёжманд оила ва фуқароларга ижтимоий нафақа ва моддий кўмак белгилаш ва тўлаш устидан назорат бўйича вазифалар эса Молия вазирлигига топширилади.
Шунингдек, «Мурувват» ва «Саховат» уйлари, Ногиронларни реабилитация қилиш ва протезлаш миллий маркази, ҳудудий ногиронлар реабилитация марказлари, уруш ва меҳнат фахрийлари учун санатория ва пансионатлар, Тошкент ва Фарғонадаги имконияти чекланган шахслар учун республика ихтисослаштирилган касб-ҳунар коллежлари, шунингдек, пойтахтдаги 2-сонли ҳуқуқшунослик коллежи Меҳнат ва аҳолини ижтимоий муҳофаза қилиш вазирлигидан Соғлиқни сақлаш вазирлиги тасарруфига ўтказилади.
Меҳнат вазирлиги фаолиятининг асосий вазифа ва йўналишлари аҳоли бандлиги даражасини чуқур таҳлил қилиш, бандликни таъминлаш дастурини ишлаб чиқиш ва уни амалга оширишни мониторинг қилишдан иборат бўлади.
Изоҳ (0)