O‘zbekiston milliy olimpiya qo‘mitasi matbuot xizmati boshlig‘i Shavkat Jalilov Lotin Amerikasi mamlakatlari, xususan, Braziliyada tarqalgan Zika virusi o‘zbekistonlik sportchilarning Rio—2016 Olimpiadasidagi ishtirokiga qanchalik ta’sir qilishi haqidagi savolga javob qaytardi. Bu haqda “Darakchi” gazetasi xabar bermoqda.
“Xalqaro olimpiya qo‘mitasidan ma’lum qilishlaricha, Braziliyada kuzatilayotgan Zika virusi muammosining oldini olish yuzasidan bugungi kunda Jahon sog‘liqni saqlash tashkiloti hamda Rio—2016 Olimpiadasi tashkiliy qo‘mitasi bilan hamkorlikda ish olib borilmoqda”, — deydi Shavkat Jalilov.
“Bir so‘z bilan aytganda, ushbu masalaga bevosita mas’ul bo‘lganlar muammoni bartaraf etish borasida barcha zarur chora-tadbirlar rejasini ishlab chiqib, amaliyotga joriy qilmoqda. Bugungi kunda Braziliya hukumati Zika virusi asoratlarini bartaraf etish uchun butun mamlakat bo‘ylab 200 mingdan ziyod sog‘liqni saqlash xodimlari va harbiylarni safarbar etilishini e’lon qildi”, — deya qo‘shimcha qildi MOQ vakili.
Izoh (0)