Ўзбекистон миллий олимпия қўмитаси матбуот хизмати бошлиғи Шавкат Жалилов Лотин Америкаси мамлакатлари, хусусан, Бразилияда тарқалган Зика вируси ўзбекистонлик спортчиларнинг Рио—2016 Олимпиадасидаги иштирокига қанчалик таъсир қилиши ҳақидаги саволга жавоб қайтарди. Бу ҳақда «Даракчи» газетаси хабар бермоқда.
«Халқаро олимпия қўмитасидан маълум қилишларича, Бразилияда кузатилаётган Зика вируси муаммосининг олдини олиш юзасидан бугунги кунда Жаҳон соғлиқни сақлаш ташкилоти ҳамда Рио—2016 Олимпиадаси ташкилий қўмитаси билан ҳамкорликда иш олиб борилмоқда», — дейди Шавкат Жалилов.
«Бир сўз билан айтганда, ушбу масалага бевосита масъул бўлганлар муаммони бартараф этиш борасида барча зарур чора-тадбирлар режасини ишлаб чиқиб, амалиётга жорий қилмоқда. Бугунги кунда Бразилия ҳукумати Зика вируси асоратларини бартараф этиш учун бутун мамлакат бўйлаб 200 мингдан зиёд соғлиқни сақлаш ходимлари ва ҳарбийларни сафарбар этилишини эълон қилди», — дея қўшимча қилди МОҚ вакили.
Изоҳ (0)