Mixail Fridman, German Xan va Aleksey Kuzmichevga qarashli LetterOne (L1) xoldingi mobil dasturlar orqali taksi buyurtma qilish xizmati — Uber’ga 200 million dollar investitsiya kiritdi. Bu haqda xolding tomonidan rasman ma’lum qilindi, deya xabar beradi “RBK”.
Xolding AQSh kompaniyasiga qachon investitsiya kiritgani va qancha ulushga ega bo‘lishi bildirilmagan. LetterOne egalariga yaqin manba kelishuv va mablag‘ miqdorini tasdiqladi, Uber servisining Rossiyadagi bo‘linmasi matbuot xizmati esa yangilikka izoh berishdan bosh tortdi.
“Uber’da kompaniyani dunyodagi eng nufuzli texnologik biznesga aylantirish uchun zarur mushohada va malakaga ega iste’dodli menejment borligi L1 investorlarini o‘ziga tordi”, — deya ta’kidlagan xolding direktorlar kengashi raisi Mixail Fridman.
Ma’lumotlarga ko‘ra, Alisher Usmonovning USM xoldingi ham Uber investori hisoblanadi: xolding 2015-yil yozida startapga bir necha o‘n million dollar mablag‘ tikkan. O‘sha paytda AQSh kompaniyasi 51 milliard dollar baholangan bo‘lsa, yil oxiriga kelib, uning qiymati 62,5 milliard dollarga yetdi. 68 mamlakatdagi 400 ta shaharda faoliyat ko‘rsatayotgan servis dunyodagi eng qimmat startaplar ro‘yxatini boshqaradi.
Izoh (0)