Dublindagi otishmani Shimoliy Irlandiya mustaqilligi uchun kurashuvchilar uyushtirgan

Bokschilarning vazn o‘lchash marosimida sodir bo‘lgan qurolli hujumni Irlandiya respublika armiyasining bo‘linmalaridan biri Continuity IRA’ning a’zolari uyushtirgan, deb xabar beradi “Korrespondent.net”.

Tashkilot hujum uchun javobgarlikni o‘z bo‘yniga olishi haqida tegishli bayonotni e’lon qildi.

Xabarda guruh bundan keyin ham “narkotik savdosi bilan shug‘ullanuvchilar va jinoyatchilar”ga hujum qilmoqchi ekanligi aytiladi.

Hujum qurboni Devid Birn ekanligi aniqlandi. Birn 2012-yilda tashkilotning boshqa bir bo‘linmasi Real IRA’ning asoschilaridan biri Alan Rayanning o‘ldirilishiga aloqadorligi ta’kidlanmoqda.

Politsiya xabariga ko‘ra, hujumda kamida olti kishi qatnashgan.

Eslatib o‘tamiz, 5-fevral, juma kuni Regency Hotel mehmonxonasida bokschilarning vaznini o‘lchash marosimi vaqtida sodir bo‘lgan hodisa oqibatida bir kishi hayotdan ko‘z yumdi, ikki kishi yaralandi.

Irlandiya respublika armiyasi o‘z maqsadi Shimoliy Irlandiyaning Buyuk Britaniyadan mustaqilligiga erishish deb biladi.