Somali samolyotidagi portlashga aloqadorlikda gumon qilinayotgan aeroport xodimlari qo‘lga olindi

Somali politsiyasi Mogadisho aeroportining ikki nafar xodimini Airbus A321 samolyoti bortidagi portlashga aloqadorlikda gumon qilib, hibsga oldi, deb xabar beradi Meduza.

Huquqni muhofaza qiluvchi organlar talqiniga ko‘ra, qo‘lga olinganlar portlovchi moslama bo‘lgan noutbukni yo‘lovchiga bergan.

Terakt tashkilotchilari o‘ylab qo‘ygan rejaga ko‘ra, layner eng yuqori balandlikka ko‘tarilganda, bomba harakatga keltirilishi, portlash samolyotning yoqilg‘i bakiga ham ta’sir qilib, samolyotdagi barcha odamlarni o‘ldirishi kerak bo‘lgan. Ammo portlovchi uskuna rejalashtirilgan balandlikdan ancha pastda harakatga keltirilgan.

Daallo Airlines aviakompaniyasining A321 samolyoti bortidagi terakt 2-fevral kuni amalga oshirilgan. Portlash natijasida bir kishi halok bo‘ldi. U layner korpusida hosil bo‘lgan yoriqdan chiqib ketgan. Uchuvchilar samolyotni muvaffaqiyatli qo‘ndirishga erishgan.