Kaliningrad yaqinida tovar poyezdi yengil avtomobil bilan temiryo‘lni kesib o‘tadigan joyda to‘qnashib ketdi. Avtomobil haydovchisi va yo‘lovchi halok bo‘ldi. Bu haqda IIVning mintaqaviy boshqarmasiga tayanib, “TASS” xabar qilmoqda.
Ozerki posyolkasida yashovchi 63 yoshli erkak taqiqlovchi signalga qaramay, temiryo‘lni kesib o‘tishga harakat qilgan. Poyezd to‘xtashga uringaniga qaramay, avtomobilga urilgan va uni 700 metrga surib borgan. Haydovchi va mashinada bo‘lgan Gvardeysk shahrida yashovchi 65 yoshli ayol hayotdan ko‘z yumdi.
To‘qnashuv yuz bergan temiryo‘lni kesib o‘tish hududida shlagbaum yo‘qligi aniqlandi. Bu joy poyezd yaqinlashib kelayotganligi haqida ogohlantiruvchi yorug‘lik va ovozli signalizatsiya bilan jihozlangan. Dastlabki taxminlarga ko‘ra, quyosh avtomobil haydovchisining ko‘zini qamashtirgan va u taqiqlovchi signalni ko‘rmay qolgan.
Avariya yuz bergan uchastkada poyezdlar harakati tiklandi. Hodisa joyida politsiyaning tezkor qidiruv guruhi va Yo‘l harakati xavfsizligi davlat inspeksiyasi ish olib bormoqda.
Izoh (0)