6-fevral, shanba kuni tunda Burundi poytaxti Bujumburada bir vaqtning o‘zida beshta granataning portlashi natijasida to‘rt kishi halok bo‘ldi, yana 20 kishi jarohat oldi. Bu haqda AFP’ga tayanib, “TASS” xabar qilmoqda.
“Eng qonli hujum 6-fevral, shanba kuni kechqurun poytaxt shimolidagi Kinama dahasidagi gavjum barda sodir bo‘ldi. Bu yerda uchta granata portlatildi”, — dedi Bujumbura meri Freddi Mbonimpa. Uning so‘zlariga ko‘ra, ikki kishi hodisa joyida vafot etgan, jumladan, o‘n yoshli bola ham. Yana ikki kishi olingan jarohatlardan shifoxonada hayotdan ko‘z yumgan.
To‘rtinchi granata Musaga tumanidagi politsiya patruliga qarata uloqtirilgan. Ushbu hodisa natijasida sakkiz nafar tinch aholi vakili jabrlangan. Harbiy patrulga qaratilgan beshinchi portlash natijasida hech kimga shikast yetmadi.
Burundidagi inqiroz o‘tgan yilning aprelida mamlakat prezidenti Pyer Nkurunziza uchinchi muddatga ham saylanish niyati borligini ma’lum qilganidan buyon davom etmoqda. U iyul oyidagi saylovlarda g‘alaba qozondi, shundan so‘ng mamlakatda ketma-ket qotilliklar ro‘y bera boshladi. BMT ma’lumotlariga ko‘ra, 26-apreldan buyon Burundida 400 kishi halok bo‘lgan va yana 3,5 mingga yaqin kishi hibsga olingan.
Izoh (0)