6 февраль, шанба куни тунда Бурунди пойтахти Бужумбурада бир вақтнинг ўзида бешта гранатанинг портлаши натижасида тўрт киши ҳалок бўлди, яна 20 киши жароҳат олди. Бу ҳақда AFP’га таяниб, «ТАСС» хабар қилмоқда.
«Энг қонли ҳужум 6 февраль, шанба куни кечқурун пойтахт шимолидаги Кинама даҳасидаги гавжум барда содир бўлди. Бу ерда учта граната портлатилди», — деди Бужумбура мэри Фредди Мбонимпа. Унинг сўзларига кўра, икки киши ҳодиса жойида вафот этган, жумладан, ўн ёшли бола ҳам. Яна икки киши олинган жароҳатлардан шифохонада ҳаётдан кўз юмган.
Тўртинчи граната Мусага туманидаги полиция патрулига қарата улоқтирилган. Ушбу ҳодиса натижасида саккиз нафар тинч аҳоли вакили жабрланган. Ҳарбий патрулга қаратилган бешинчи портлаш натижасида ҳеч кимга шикаст етмади.
Бурундидаги инқироз ўтган йилнинг апрелида мамлакат президенти Пьер Нкурунзиза учинчи муддатга ҳам сайланиш нияти борлигини маълум қилганидан буён давом этмоқда. У июль ойидаги сайловларда ғалаба қозонди, шундан сўнг мамлакатда кетма-кет қотилликлар рўй бера бошлади. БМТ маълумотларига кўра, 26 апрелдан буён Бурундида 400 киши ҳалок бўлган ва яна 3,5 мингга яқин киши ҳибсга олинган.
Изоҳ (0)