Somali hukumati 7-yanvar kuni Eron bilan diplomatik aloqalarni uzdi. Bu haqda Eronning Tasnim agentligiga tayanib, “TASS” xabar bermoqda.
“Somali 7-yanvar, payshanba kuni Eron bilan aloqalarni bekor qilganini ma’lum qildi, — deyiladi agentlik xabarida. — Shunday qilib, sharqiy Afrikadagi davlat so‘nggi kunlardagi mojarolar tufayli Tehron bilan diplomatik aloqalarni uzgan Saudiya Arabistoni boshchiligidagi mamlakatlar qatoriga qo‘shildi”.
Eslatib o‘tamiz, Saudiya Arabistoni tashqi ishlar vazirligi 2-yanvar kuni terrorizm va fitna uchun sudlangan 47 kishi, shu jumladan, shialar xatibi Nimr an-Nimrga nisbatan o‘lim hukmi ijro etilganini e’lon qilgan edi. Shundan so‘ng Tehronda namoyishchilar Saudiya Arabistoni elchixonasiga hujum qildi.
Ushbu hodisadan so‘ng avvaliga Saudiya Arabistoni, keyinroq esa Sudan, Bahrayn va Jibuti Eron bilan diplomatik aloqalarni uzdi. BAA esa Tehron bilan diplomatik aloqalar darajasini pasaytirdi. Kuvayt va Qatar Erondan o‘z elchilarini chaqirib olishga qaror qildi.
Izoh (0)