Сомали ҳукумати Эрон билан дипломатик алоқаларни узди
Сомали ҳукумати 7 январь куни Эрон билан дипломатик алоқаларни узди. Бу ҳақда Эроннинг Tasnim агентлигига таяниб, «ТАСС» хабар бермоқда.
«Сомали 7 январь, пайшанба куни Эрон билан алоқаларни бекор қилганини маълум қилди, — дейилади агентлик хабарида. — Шундай қилиб, шарқий Африкадаги давлат сўнгги кунлардаги можаролар туфайли Теҳрон билан дипломатик алоқаларни узган Саудия Арабистони бошчилигидаги мамлакатлар қаторига қўшилди».
Эслатиб ўтамиз, Саудия Арабистони ташқи ишлар вазирлиги 2 январь куни терроризм ва фитна учун судланган 47 киши, шу жумладан, шиалар хатиби Нимр ан-Нимрга нисбатан ўлим ҳукми ижро этилганини эълон қилган эди. Шундан сўнг Теҳронда намойишчилар Саудия Арабистони элчихонасига ҳужум қилди.
Ушбу ҳодисадан сўнг аввалига Саудия Арабистони, кейинроқ эса Судан, Баҳрайн ва Жибути Эрон билан дипломатик алоқаларни узди. БАА эса Теҳрон билан дипломатик алоқалар даражасини пасайтирди. Кувайт ва Қатар Эрондан ўз элчиларини чақириб олишга қарор қилди.
