Milliarder Alisher Usmonov hech kimga hech qanday meros qoldirmaydi. Bu haqda u Forbes jurnaliga bergan intervyusida aytib o‘tgan.
“Hech kimga hech narsa qoldirmayman. Farzandlarim yo‘q, boyligimni esa hayotim davomida o‘zimga va boshqalarga kerak deb hisoblagan narsalar uchun sarflashga ulguraman. Qolganini esa do‘stlarim men aytganimdek taqsimlashadi”, — deydi milliarder.
“Payg‘ambar yoshi — 63 ga to‘lguncha nima qilish haqida o‘ylab ko‘rsa bo‘ladi, biroq undan so‘ng manfaat ko‘zlab ishlashni istamayman. Shu sababli 63 yoshimda pul topish faoliyatimni to‘xtataman. Xayriya bilan shug‘ullanishim aniq. Agar, nasib qilsa, hayot bo‘lsam, albatta”, — deya qo‘shimcha qildi Alisher Usmonov.
Eslatib o‘tamiz, 2016-yil 9-sentabr kuni 63 yoshga to‘ladigan milliarder Alisher Usmonov 2015-yil yakunlariga ko‘ra 14,4 milliard dollar mablag‘ bilan Rossiyaning eng badavlat uchinchi odami bo‘ldi, bungacha 2012—2014-yillar davomida ketma-ket uch yil Rossiyaning eng badavlat odami deb topilgandi.
Izoh (0)