AQShning Florida shtatida yashovchi 31 yoshli Jeyms Dirman 6 yoshli o‘g‘lini videoo‘yin tufayli o‘ldirib qo‘ydi. Hodisa Rojdestvo bayrami arafasida ro‘y berdi, deya xabar qiladi Sky News.
Qo‘lga olinganning ma’shuqasi politsiyaga ma’lum qilishicha, videoo‘yin bilan mashg‘ul bo‘lgan Dirman ikki o‘g‘lini uxlagani jo‘natadi, ammo ular shovqin qilishda davom etadi. Shunda ota bolalarini jazolash uchun ularni devor yoniga turg‘izib qo‘yib, o‘girilishni buyuradi. Biroq bolalarning kichigi u qanday o‘ynayotganini kuzatayotganini payqagan Dirman g‘azabga minadi.
U o‘g‘lini divanga yotqizib, yuziga yostiq bostirib, ustiga o‘tirib oladi. Jeyms o‘g‘lining nafas ololmayotgani haqidagi qichqirig‘iga ham parvo qilmay, o‘yin o‘ynashda davom etadi. Bularning bari uning akasi ko‘z o‘ngida ro‘y beradi.
Juftlik bola nafas olmayotganini sezgach, qutqaruv xizmatiga qo‘ng‘iroq qiladi, ammo ular yetib kelgach o‘lim holatini qayd etadi, xolos. Yuz bergan hodisani o‘rganayotgan politsiyachilar mazkur voqeadan dahshatga tushdi. Okrug sherifi ushbu qotillikni “o‘ta razil jinoyat” deb atadi. Ayni paytda Jeyms Dirman qamoqxonada sud hukmini kutmoqda.
Izoh (0)