Rossiya Turkiyadan Su-24 uchuvchisi otib o‘ldirilishiga aloqador bo‘lgan Alparslon Chelik zudlik bilan qo‘lga olinishini talab qildi. Bu haqda Rossiya tashqi ishlar vazirligi saytida joylashtirilgan bayonotda ma’lum qilingan, deya xabar beradi “Gazeta.ru”.
“Turk rasmiylaridan Chelik va uning safdoshlarini tutish hamda rossiyalik uchuvchi o‘ldirilganligi, shuningdek, xorijiy davlat hududida noqonuniy qurolli tuzilmalar tomonida jangovar harakatlarda ishtirok etganligi uchun jinoiy javobgarlikka tortish choralarini ko‘rishni talab qilamiz”, — deya ta’kidlagan Rossiya TIV rasmiy vakili Mariya Zaxarova.
Vazirlik ma’lumotlariga ko‘ra, Chelik 27-dekabr kuni Turkiyaning Hurriyet gazetasiga intervyu bergan va unda rossiyalik uchuvchi o‘ldirilishida ishtirok etganini tan olgan. Mazkur intervyu yuzasidan Turkiya rasmiylari hech qanday izoh bermagani Rossiya tomonining noroziligiga sabab bo‘lgan.
Izoh (0)