Gruziya prezidenti Georgiy Margvelashvili 30-dekabr, chorshanba kuni Georgiy Kvirikashvilini mamlakat bosh vaziri etib tayinlash to‘g‘risidagi farmoyishni imzoladi. Bu haqda “RIA Novosti” xabar bermoqda.
29-dekabr, seshanba kuni Gruziya parlamenti Kvirikashvili boshchiligidagi yangi hukumatga ko‘pchilik ovoz bilan ishonch bildirdi: 86 nafar deputat hukumat va uning dasturini yoqlab ovoz bergan, 28 nafar deputat — muxolifatdagi yagona milliy harakat va “Ozod demokratlar” vakillari qarshi chiqqan.
Yangi hukumat bosh vazir Irakliy Garibashvili iste’fosidan so‘ng shakllantirildi. Parlamentdagi ko‘pchilik bosh vazir o‘rinbosari va tashqi ishlar vaziri bo‘lib ishlab kelayotgan Georgiy Kvirikashvili nomzodini ilgari surdi, uni prezident ham ma’qulladi.
Hukumatda eski tarkibning deyarli barcha vazirlari qoldi. Yangi shaxslar Kvirikashvili qoldirgan lavozimlarga keldi, xolos: iqtisodiyot vaziri Dmitriy Kumsishvili bosh vazir o‘rinbosari etib tayinlandi, tashqi ishlar vazirligini boshqarish esa shu paytga qadar Kvirikashvilining birinchi o‘rinbosari bo‘lib ishlab kelgan Mixail Janelidzega topshirildi.
Izoh (0)