Xitoyning oliy qonunchilik organi — Butunxitoy xalq vakillari kengashi (BXVK) doimiy qo‘mitasi 27-dekabr, yakshanba kuni terrorchilikka qarshi kurash bo‘yicha yangi qonun qabul qildi. Bu haqda “Vedomosti” xabar bermoqda.
Reuters agentligining qayd etishicha, qabul qilingan hujjat axborot texnologiyalari sohasida faoliyat olib borayotgan kompaniyalarga maxfiy ma’lumotlarni, xususan, shifrlangan kalitlarni hukumat so‘roviga asosan taqdim etish majburiyatini yuklaydi, shuningdek, Xitoy harbiylariga mamlakatdan tashqarida aksilterror operatsiyalarini o‘tkazish vakolatini beradi.
Xitoy rasmiylarining ta’kidlashicha, mamlakat ayniqsa Shinjon-Uyg‘ur muxtor tumanida jangarilar va ayirmachilarning o‘sib borayotgan tahdidiga duch kelmoqda — so‘nggi bir necha yildan beri ushbu hududda kuzatilgan xunrezliklar oqibatida bir necha yuz kishi halok bo‘ldi.
Parlamentning qonunchilik qo‘mitasining kriminal huquq bo‘yicha kichik qo‘mitasi raisi Li Shouvey Xitoy G‘arb mamlakatlari qilib bo‘lgan ishni takrorlayotganini, ya’ni, texnologik kompaniyalardan terrorchilikka qarshi kurashda yordam so‘rayotganini qayd etib o‘tdi.
Izoh (0)