Mavrikiy orolidan Parijga yo‘l olgan va Keniyada shoshilinch qo‘ngan Air France kompaniyasining Boeing 777 samolyoti bortida portlovchi qurilma topilmadi. Bu haqda 20-dekabr, yakshanba kuni kompaniya bosh direktori Frederik Gajei ma’lum qildi, deya xabar beradi “TASS”.
“Portlovchi qurilma topilmadi. Bu shunday qurilmaga o‘xshatib yasalgan nusxa — mulyaj bo‘lgan. U vaqt relesiga o‘xshash mexanizm bilan ta’minlangan. Relega kartondan yasalgan qutichalar ulangan”, — deya ta’kidlagan Gajei. Uning bildirishicha, Air France samolyotlariga go‘yo bomba joylashtirilgani haqida oxirgi ikki hafta ichida to‘rtta xabar olingan — uchtasi AQShda va to‘rtinchisi Mavrikiy—Parij reysi bilan bog‘liq hozirgi holat. Mulyajni kim tayyorlagani, samolyotga uchishga qadar yoki parvoz davomida joylashtirilgani hozircha noma’lum.
Boeing bortida 14 nafar ekipaj a’zosi va 459 nafar yo‘lovchi bo‘lgan. Fransuz OAV ma’lumotlariga ko‘ra, ular Parijga parvozni davom ettirish uchun mehmonxonalardan aeroportga keltirilgan.
Eslatib o‘tamiz, oldinroq Air France aviakompaniyasiga tegishli Boeing 777 samolyoti layner hojatxonalarining birida shubhali buyum topilganidan so‘ng Keniyaning Mombasa shahri aeroportiga favqulodda qo‘ndirilgani haqida xabar berilgandi.
Izoh (0)