Air France бош директори Фредерик Гажеи: Boeing бортидан топилган «портловчи қурилма» муляж бўлиб чиқди

Маврикий оролидан Парижга йўл олган ва Кенияда шошилинч қўнган Air France компаниясининг Boeing 777 самолёти бортида портловчи қурилма топилмади. Бу ҳақда 20 декабрь, якшанба куни компания бош директори Фредерик Гажеи маълум қилди, дея хабар беради «ТАСС».

«Портловчи қурилма топилмади. Бу шундай қурилмага ўхшатиб ясалган нусха — муляж бўлган. У вақт релесига ўхшаш механизм билан таъминланган. Релега картондан ясалган қутичалар уланган», — дея таъкидлаган Гажеи. Унинг билдиришича, Air France самолётларига гўё бомба жойлаштирилгани ҳақида охирги икки ҳафта ичида тўртта хабар олинган — учтаси АҚШда ва тўртинчиси Маврикий—Париж рейси билан боғлиқ ҳозирги ҳолат. Муляжни ким тайёрлагани, самолётга учишга қадар ёки парвоз давомида жойлаштирилгани ҳозирча номаълум.

Boeing бортида 14 нафар экипаж аъзоси ва 459 нафар йўловчи бўлган. Француз ОАВ маълумотларига кўра, улар Парижга парвозни давом эттириш учун меҳмонхоналардан аэропортга келтирилган.

Эслатиб ўтамиз, олдинроқ Air France авиакомпаниясига тегишли Boeing 777 самолёти лайнер ҳожатхоналарининг бирида шубҳали буюм топилганидан сўнг Кениянинг Момбаса шаҳри аэропортига фавқулодда қўндирилгани ҳақида хабар берилганди.