“Hi-Tech Mail.Ru” zamonaviy texnika yordamida mo‘jizaviy tarzda omon qolish holatlarini bir sahifaga jamladi, “Daryo” qisman to‘ldirdi.
O‘q va siniq parchalardan himoya
Cho‘ntak yoki qo‘ldagi smartfon o‘z egasini o‘limdan saqlab qolgani bilan bog‘liq holatlar bir necha bor qayd etilgan.
Shu yilning noyabr oyida Parijda teraktlar ketma-ketligi yuz berdi. Hodisalar markaziga yaqin joyda bo‘lib, telefonda gaplashib turgan bir erkak portlovchi uskuna parchasidan mo‘jizaviy tarzda omon qoldi. Samsung Galaxy S6 Edge zarbani o‘ziga qabul qilib, egasining boshini jarohatdan saqladi. Afg‘onistondagi amerikalik askarning iPhone 5 smartfoni bilan ham xuddi shunday voqea yuz bergandi (terrorchi-xudkush o‘zini portlatib yuborganidan so‘ng, bomba parchasi askarning ko‘kragiga kelib urilgan, biroq qalqon vazifasini o‘tagan iPhone uni o‘limdan saqlab qolgan).
Yaqinda San-Bernardinoda yuz bergan otishma vaqtida iPhone 24 yoshli amerikalikni o‘ldiruvchi o‘qdan asrab qoldi, Buyuk Britaniyada boshqa bir iPhone (5c modeli) ov miltig‘idan amalga oshirilgan otishdan keyingi jarohatlar ko‘lamini kamaytirdi, AQShda son arteriyasining shikastlanishidan saqlab qoldi, Tailandda Samsung Galaxy Note 2 politsiyachini o‘qdan yaralangani haqida ogohlantirdi.
Suriyada esa o‘q Nokia Lumia’ga tiqilib qoldi (telefon egasi jangni tasvirga olayotgan vaqti, daydi o‘qlardan biri uchib kelib, telefonga tiqilib qolgan va egasini qutqargan). Boshqa bir Nokia (Lumia 520) hatto internet-memga aylanib ketdi — politsiyachi shimining orqa cho‘ntagida turgan smartfonga o‘q kelib tekkan.
Hayotbaxsh qo‘ng‘iroq
Avtofalokatdan so‘ng yordam ko‘rsatish tezligi jabrlanuvchilar omon qolishi va jarohatlari ko‘lami kattalashib ketmasligiga sezilarli darajada ta’sir qiladi. Biroq bunday holatda gadjetlarni topish oson emas.
Politsiyachi “iPhone’ni topish” funksiyasi yordamida yo‘l-transport hodisasiga uchragan qizning qayerda ekanligi aniqlagan, ariqqa tushib ketgan erkak esa iPhone’ni topish uchun Apple Watch’dagi Ping-testdan foydalanib, oxir-oqibat yordam chaqirishga erishgan.
Eng g‘alati hodisalar
Bu yo‘nalishda birinchi o‘rinni bir xitoylikni beton devordan asrab qolgan Nokia Lumia 920 ga bersa bo‘ladi. Ikkinchi o‘rinda — farzandlari bilan birga garovga olingan ayol.
Ayol mobil dastur orqali pitssa buyurtirkan, izoh qismida unga 911 yordami kerakligini ma’lum qilgan. Ayolga smartfonni faqatgina taom buyurtma qilish uchun qaytargan jinoyatchi voqealar bunday rivojlanishi mumkinligini xayoliga ham keltirmagan edi.
Bundan tashqari, Avstraliyada 11 yoshli qiz iPhone fonarchasi yordamida onasining hayotini saqlab qoldi, AQShda mashina ostida qisilib qolib, qo‘lini qimirlata olmay qolgan o‘smirning joniga iPhone’dagi to‘satdan ishlab ketgan Siri ovozli yordamchisi oro kirdi, Apple Watch aqlli soat esa bir amerikalikning o‘smirning o‘zi bilmagan dardini aniqlab, o‘limdan asradi. Amerikalik bir qahramon ota esa selfi-tayoq yordamida qizini o‘limdan qutqarib qoldi.
Izoh (0)