OAV: Turkiya qiruvchi samolyotlari Iroqning chegaraoldi hududlariga zarba berdi

Turkiya qiruvchi samolyotlari Iroq havo kengliklarini buzib, mamlakatning Turkiya bilan chegarasi yaqinidagi hududlariga bombalar yog‘dirdi. Bu haqda Eronning Fars agentligi ma’lum qildi, deya xabar beradi “TASS”.

“Turk qiruvchilari 9-dekabr, chorshanba kuni Iroq havo kengliklarini buzib, Turkiya bilan chegara yaqinidagi Daxuk viloyatining al-Imadiya tumaniga zarbalar berdi, — deyiladi Eron agentligi xabarida. — Guvohlarning ta’kidlashicha, yarim soatdan oshiq davom etgan aviazarbalar Kurdiston ishchi partiyasining (KIP) Dayrluk va Shilajidagi marralariga berilgan”.

Shuningdek, Fars ma’lumotlariga ko‘ra, turk samolyotlari 8-dekabr, seshanba kechki payt ham KIPning Iroq Kurdistonidagi bazasiga hujum qilgan.