Latviya bosh vaziri Laymdota Strauyuma 7-dekabr, dushanba kuni mamlakat prezidenti Raymonds Veyonis bilan uchrashuvidan so‘ng hukumat iste’foga chiqqanini e’lon qildi. Davlat rahbari yangi hukumat shakllanganidan so‘ng Latviya seymidagi (parlament) ishiga qaytishini ma’lum qilgan bosh vazirga ikki yil davomidagi faoliyati uchun minnatdorchilik bildirdi, deya xabar beradi “TASS”.
30-noyabrda qabul qilingan 2016-yil uchun mo‘ljallangan davlat budjeti, shuningdek, kelgusi yil boshidan davlat va munitsipial idoralar mansabdor shaxslari, jumladan, bosh vazir hamda vazirlar maoshi 600-700 yevroga (o‘rtacha 20-30%) oshirilishi to‘g‘risidagi qaror keskin tanqidga uchragach, bosh vazir iste’fosi haqidagi ovozalar ko‘paydi. So‘nggi so‘rovlarga ko‘ra, Strauyumani bosh vazir lavozimida aholining atigi 3 foizi ko‘rishni istagan.
Latviya seymi yil oxiriga qadar mamlakatning yangi hukumatini tasdiqlashi kutilmoqda.
Izoh (0)