Toshkent viloyatidagi Tugan Falcionry Club kamyob qushlar pitomnigi xodimlari bir yil davomida 48 dona itolg‘ini erkinlikka chiqardi. “RIA Novosti” xabariga ko‘ra, Qizil kitobga kiritilgan lochinlar oilasiga mansub bu qushlar sonini ko‘paytirish maqsad qilingan.
“4-dekabr, juma kuni Qurama tizmalarida navbatdagi to‘rtta itolg‘i erkinlikka chiqarildi, ularning ikkitasi pitomnikda tuxumdan chiqqan, qolgan ikkitasi esa brakonyerlardan olib qo‘yilgan”, — deyiladi O‘zbekiston Tabiatni muhofaza qilish davlat qo‘mitasi matbuot xizmati xabarida.
Erkinlikka chiqarish arafasida barcha qushlarga maxsus mikrochiplar o‘rnatiladi va bu uskuna yordamida lochinlarning yovvoyi tabiatda yashab ketishi kuzatib boriladi. Tugan Falconry Club rahbariyati Qizil kitobga kiritilgan boshqa bir qush — cho‘l lochinini ham ko‘paytirishni rejalashtirmoqda.
Itolg‘i O‘zbekiston va boshqa bir qancha mamlakatlarning Qizil kitobiga kiritilgan. Bundan tashqari, u Yo‘qolib ketish xavfi ostida turgan yovvoyi fauna va flora turlari bilan xalqaro savdo qilish haqidagi konvensiyaning ikkinchi ro‘yxatiga kiritilgan.
Itolg‘ilar Toshkent viloyatida joylashgan Ugom-Chotqol milliy bog‘ining bir qator hududlariga in qo‘yadi. So‘nggi yillarda brakonyerlarning xatti-harakatlari sabab bu qushlarning soni keskin kamayib ketgandi.
Izoh (0)