Тошкент вилоятидаги Tugan Falcionry Club камёб қушлар питомниги ходимлари бир йил давомида 48 дона итолғини эркинликка чиқарди. «РИА Новости» хабарига кўра, Қизил китобга киритилган лочинлар оиласига мансуб бу қушлар сонини кўпайтириш мақсад қилинган.
«4 декабрь, жума куни Қурама тизмаларида навбатдаги тўртта итолғи эркинликка чиқарилди, уларнинг иккитаси питомникда тухумдан чиққан, қолган иккитаси эса браконерлардан олиб қўйилган», — дейилади Ўзбекистон Табиатни муҳофаза қилиш давлат қўмитаси матбуот хизмати хабарида.
Эркинликка чиқариш арафасида барча қушларга махсус микрочиплар ўрнатилади ва бу ускуна ёрдамида лочинларнинг ёввойи табиатда яшаб кетиши кузатиб борилади. Туган Falconрй Cлуб раҳбарияти Қизил китобга киритилган бошқа бир қуш — чўл лочинини ҳам кўпайтиришни режалаштирмоқда.
Итолғи Ўзбекистон ва бошқа бир қанча мамлакатларнинг Қизил китобига киритилган. Бундан ташқари, у Йўқолиб кетиш хавфи остида турган ёввойи фауна ва флора турлари билан халқаро савдо қилиш ҳақидаги конвенциянинг иккинчи рўйхатига киритилган.
Итолғилар Тошкент вилоятида жойлашган Угом-Чотқол миллий боғининг бир қатор ҳудудларига ин қўяди. Сўнгги йилларда браконерларнинг хатти-ҳаракатлари сабаб бу қушларнинг сони кескин камайиб кетганди.
Изоҳ (0)