Chechenistonda politsiyachilarga bir oyda 300 ming marta namoz o‘qish majburiyati yuklatilgani haqidagi xabar uydirma bo‘lib chiqdi

Checheniston ichki ishlar vazirligi politsiyachilar Muhammad (s.a.v.) payg‘ambarga necha marta salovat aytganini hisoblab borishi haqidagi xabarni rad etdi, deya xabar bermoqda “TASS” muassasa matbuot xizmatiga tayanib.

“Namoz o‘qish va boshqa diniy farzlarni bajarish, qayerda va qanday lavozimda ishlashidan qat’i nazar, har bir dindorning shaxsiy ishidir. Checheniston Respublikasi bo‘yicha IIV bunday ma’lumotlarni to‘plamaydi”, — deyiladi matbuot xizmati xabarida.

Muassasadagilar ta’kidlashicha, telefonogramma tarqatilgani haqidagi axborot provokatsiyadir. Unda Checheniston IIV rahbari Ruslan Alxanov Ramzan Qodirov topshirig‘iga binoan, xodimlar necha marta salovat o‘qishini hisoblab borishni buyurgani aytiladi. Ayni paytda tekshiruv olib borilmoqda, uning natijasida soxta xabar mualliflari aniqlanishi kerak.

Nashr eslatishicha, telefonogrammada 20-noyabrdan 27-dekabrga qadar har bir xodim 300 ming marta salovat o‘qishi kerakligi belgilangan edi.