Oq uy hududiga kirib olgan 22 yoshli konnektikutlik Jozef Kaputo onasi va do‘stlariga o‘limidan avvalgi maktublarni qoldirgani ma’lum bo‘ldi, deb yozadi Patch nashri.
U onasiga atalgan xatda uyga tirik qaytmasligini yozgan bo‘lsa, do‘stlariga bitgan maktubida o‘zining xatti-harakati uchun hech kimni ayblamaslikni so‘ragan.
26-noyabr, Shukronalik kunida Maxfiy xizmat agentlari qo‘lida Amerika bayrog‘i va papka bo‘lgan Kaputoni qo‘lga tushirgan edi. U devordan oshib o‘tib, Oq uy hududiga kirgan edi. U tutilishidan oldin 20 metrcha masofagacha yugurishga ulgurgan. Bu paytda davlat rahbari va uning rafiqasi Oq uyda oila davrasida bayramni nishonlayotgan bo‘lgan.
So‘roq chog‘ida Kaputo o‘z mamlakatini sevishini hamda ushbu qilig‘idan so‘ng tirik qolishni rejalashtirmaganini aytdi. 27-noyabr kuni tartibbuzar sudga yetkazildi, biroq Maxfiy xizmat kafilligi ostida ruhiy ekspertizadan o‘tish uchun ozodlikka chiqarildi. Yangi sud majlisi 30-noyabrga belgilandi.
Nashr ma’lumotiga ko‘ra, Jozef Kaputo bolaligidan beri Asperger sindromiga chalingan.
Izoh (0)