Toshkent halqa avtomobil yo‘li bo‘laklaridan biri — Ohangaron yo‘lida 26-noyabr, payshanba kuni bir necha avtomobil ishtirokida yirik yo‘l-transport hodisasi yuz berdi. Avariya joyidan olingan fotosuratlar Facebook’dagi “Voditeli Tashkenta” guruhida e’lon qilingan, Telegram messenjeri orqali tarqatilgan.
Fotosuratlarda YTH oqibatida yuqori (tom) qismi yo‘q bo‘lib ketgan Damas, ag‘darilgan Nexia, shuningdek, pachoq bo‘lgan Matiz va Nexia avtomobillarini ko‘rish mumkin. “Voditeli Tashkenta” guruhi a’zolari YTHda Lacetti avtomobili ham qatnashganini qayd etib o‘tgan.
“Lacetti va Nexia o‘zaro to‘qnashuv sodir etgan, to‘qnashuv zarbidan Nexia yo‘lning qarama-qarshi tomoniga (bordyurga chiqib) uchib o‘tib, Damas’ga va qisman Matiz’ga urilgan”, — deb yozadi foydalanuvchilardan biri. Damas’da gaz ballon uskunasi bo‘lgani va u portlagani haqidagi fikrlar rad etilgan.
Foydalanuvchilar tomonidan qoldirilgan va tasdiqlanmagan ma’lumotlarga ko‘ra, hodisa oqibatida olti kishi halok bo‘lgan, halok bo‘lganlar orasida bolalar borligi aytilmoqda. “Besh kishi voqea joyida, yana biri 16-shahar kasalxonasida vafot etgan”, — deb yozadi guruh a’zolaridan biri. Qurbonlardan biri litseydan qaytayotgan o‘quvchi qiz ekani haqida Facebook’dagi guruhda alohida xabar qoldirilgan.
Mazkur yo‘l-transport hodisasi yuzasidan hozircha rasmiy axborot berilgani yo‘q.
Izoh (0)