Тошкент ҳалқа автомобиль йўли бўлакларидан бири — Оҳангарон йўлида 26 ноябрь, пайшанба куни бир неча автомобиль иштирокида йирик йўл-транспорт ҳодисаси юз берди. Авария жойидан олинган фотосуратлар Facebook’даги «Водители Ташкента» гуруҳида эълон қилинган, Telegram мессенжери орқали тарқатилган.
Фотосуратларда ЙТҲ оқибатида юқори (том) қисми йўқ бўлиб кетган Damas, ағдарилган Nexia, шунингдек, пачоқ бўлган Matiz ва Nexia автомобилларини кўриш мумкин. «Водители Ташкента» гуруҳи аъзолари ЙТҲда Lacetti автомобили ҳам қатнашганини қайд этиб ўтган.
«Lacetti ва Nexia ўзаро тўқнашув содир этган, тўқнашув зарбидан Nexia йўлнинг қарама-қарши томонига (бордюрга чиқиб) учиб ўтиб, Damas’га ва қисман Matiz’га урилган», — деб ёзади фойдаланувчилардан бири. Damas’да газ баллон ускунаси бўлгани ва у портлагани ҳақидаги фикрлар рад этилган.
Фойдаланувчилар томонидан қолдирилган ва тасдиқланмаган маълумотларга кўра, ҳодиса оқибатида олти киши ҳалок бўлган, ҳалок бўлганлар орасида болалар борлиги айтилмоқда. «Беш киши воқеа жойида, яна бири 16-шаҳар касалхонасида вафот этган», — деб ёзади гуруҳ аъзоларидан бири. Қурбонлардан бири лицейдан қайтаётган ўқувчи қиз экани ҳақида Facebook’даги гуруҳда алоҳида хабар қолдирилган.
Мазкур йўл-транспорт ҳодисаси юзасидан ҳозирча расмий ахборот берилгани йўқ.
Изоҳ (0)