O‘zbekiston Respublikasi Prezidenti Islom Karimov 2015-yil 26-noyabr kuni Xayrullo Hayitboyevich Bozorovni Namangan viloyati hokimi lavozimiga tayinlash to‘g‘risida farmonni imzoladi, deb xabar qiladi O‘zA.
Xayrullo Bozorovning nomzodi xalq deputatlari Namangan viloyat Kengashining qaroriga muvofiq tasdiqlandi.
O‘zbekiston Respublikasi Prezidenti farmoniga muvofiq Bahodir Tursunovich Yusupov Namangan viloyati hokimi lavozimidan ozod etildi.
Namangan viloyati hokimligi sayti ma’lumotlariga ko‘ra, 39 yoshli Xayrullo Bozorov 2014-yildan viloyatdagi Mingbuloq tumani hokimi sifatida ishlab kelayotgandi, bungacha 2009—2014-yillarda Chust tumani hokimi, 2008—2009-yillarda Uchqo‘rg‘on tumani hokimi, 2007—2008-yillarda esa viloyat hokimining iqtisodiy va ijtimoiy rivojlantirish masalalari bo‘yicha o‘rinbosari lavozimlarida faoliyat ko‘rsatgan.
Xayrullo Bozorov Namangan sanoat-texnologiya institutini iqtisodchi-menejer mutaxassisligi bo‘yicha tamomlagan; O‘zbekiston Oliy Majlisi Senatining Budjet va iqtisodiy islohotlar masalalari qo‘mitasi a’zosi.
Izoh (0)