“Shahrisabz vino-aroq” haydovchisi sambo bo‘yicha Isroilda o‘tgan jahon chempionatida birinchi bo‘ldi

“Shahrisabz vino-aroq” kompaniyasida haydovchi bo‘lib ishlovchi 38 yoshli Murodulla Nazarov Isroilning Ashdod shahrida tashkil etilgan sambo bo‘yicha faxriy-ustalar o‘rtasidagi jahon chempionatida 35—39 yoshlilar toifasida va 62 kilogrammgacha bo‘lgan vazn toifasida birinchi o‘rinni egalladi. Bu haqda “Qashqadaryo” gazetasi xabar bermoqda.

“Shahrisabz vino-aroq” kompaniyasi homiyligida musobaqaga yo‘l olgan Murodulla Nazarov finalgacha Gretsiya, Litva va Qozog‘iston polvonlarini, hal qiluvchi bahsda esa rossiyalik sportchini mag‘lub etdi. “Uning sharafiga O‘zbekiston madhiyasi yangradi va Davlat bayrog‘i ko‘tarildi”, — deyiladi gazeta xabarida.

Qayd etishlaricha, musobaqada jahonning 24 mamlakatidan 267 nafar sportchi qatnashgan. O‘zbekiston sharafini sakkiz nafar sportchi himoya qilib, Nazarovdan tashqari, qamashilik Baxtiyor To‘rayev 55—59 yoshlilar toifasida va 100 kilogrammdan yuqori vazn toifasida oltin medal egasiga aylangan, yana ikki o‘zbekistonlik sportchi sovrindor bo‘lgan.

Jahon chempionatidagi g‘alabasini otasi — Shahrisabz paxta zavodi ishchisi Zulfiqor Nazarovga bag‘ishlagan Murodulla Nazarov sambo bo‘yicha xalqaro toifadagi sport ustasi, jangovar sambo, dzyudo va kurash bo‘yicha sport ustasi hisoblanadi. U sambo bo‘yicha o‘smirlar va yoshlar o‘rtasidagi O‘zbekiston va Osiyo chempionatlarida bir necha bor g‘olib chiqqan, jangovar sambo bo‘yicha Jahon kubogi va Rossiyada tashkil etilgan xalqaro musobaqalarda sovrindor bo‘lgan.

“Shahrisabz vino-aroq” kompaniyasi haydovchisi 2016-yili sambo bo‘yicha faxriy-ustalar o‘rtasida Xorvatiya o‘tkaziladigan jahon chempionatida qatnashish bilan cheklanmoqchi emas. “Orzuim — dzyudo bo‘yicha faxriy-ustalar o‘rtasidagi jahon chempionatida ishtirok etish”, — dedi Murodulla Nazarov.